সূদীৰ্ঘ ন মাহৰ অন্তত পৃথিৱীলৈ উভতিল সুনীতা উইলিয়ামছ

অৱশেষত স্বভূমিত সুনীতা উইলিয়ামছ-বুচ উইলম’ৰ। অপেক্ষাৰ অন্ত পেলাই পৃথিৱীৰ ভূমিত খোজ দিলে মহাকাশচাৰী সুনীতা উইলিয়ামছ আৰু বুচ উইলম’ৰ। মহাকাশত প্ৰায় ৯ মাহ কাল কটোৱাৰ পিছত স্পেচএক্স ড্ৰেগন মহাকাশযানেৰে উভতিব সক্ষম হয় দুই মহাকাশচাৰীদ্বয়।

উল্লেখ্য যে, ভাৰতীয় সময় অনুসৰি ৩.২৭ বজাত ফ্ল’ৰিডাৰ উপসাগৰীয় উপকূলৰ পৰা নিৰাপদে অৱতৰণ কৰে ইলন মাস্কৰ স্পেচএক্স ড্ৰেগন। 

উল্লেখযোগ্য যে, ২০২৪ৰ ৫ জুনত ৮ দিনৰ বাবে মহাকাশলৈ গৈছিল সুনীতা উইলিয়াম আৰু বুচ উইলম’ৰ। কিন্তু মহাকাশযানত হোৱা বিজুতিৰ বাবে উভতিব পৰা নাছিল দুই মহাকাশচাৰী । এই দীঘলীয়া ৯ মাহৰ ভিতৰত নাছাই কেইবাবাৰো তেওঁলোকক উদ্ধাৰৰ বাবে চেষ্টা চলাইছিল যদিও বাৰে বাৰে ব্যৰ্থ হৈছিল। এনে ব্যৰ্থতাৰ বাবেই বিশ্বজুৰি দুই মহাকাশচাৰীক লৈ অনিশ্চয়তাৰ সৃষ্টি হোৱা দেখা গৈছিল। অৱশেষত মহাকাশত আৱদ্ধ হৈ থকা মহাকাশচাৰী দুগৰাকীক ইলন মাস্কৰ সহযোগত পৃথিৱীলৈ উভতাই অনা হয়।

আন্তঃৰাষ্ট্ৰীয় মহাকাশ কেন্দ্ৰৰ বৰ্তমান অধিয়াক তথা আমেৰিকাৰ নৌসেনাৰ অৱসৰপ্ৰাপ্ত বিষয়া সুনীতা উইলিয়ামছে ১৯৯৮ চনত নাছাত যোগদান কৰিছিল। তেতিয়াৰে পৰা এই পৰ্যন্ত তেওঁ সৰ্বাধিত মহাকাশ ভ্ৰমণ কৰা মহিলা মহাকাশচাৰীৰ অভিলেখ গঢ়িছে।

এক্স (পূৰ্বতে টুইটাৰ)ত কৰা এটা টুইটত হোৱাইট হাউছে মহাকাশচাৰীসকলৰ সফল প্ৰত্যাৱৰ্তনৰ ওপৰত আলোকপাত কৰে আৰু স্পেচএক্স ড্ৰেগন মহাকাশযানৰ স্প্ল্যাশ্বডাউন কৰাৰ ফুটেজ শ্বেয়াৰ কৰে। পোষ্টটোৰ সৈতে ৰাষ্ট্ৰপতি ট্ৰাম্পে মহাকাশচাৰীসকলক উদ্ধাৰ কৰাৰ প্ৰতিশ্ৰুতি পূৰণ কৰাৰ এটা বিবৃতিও আছিল আৰু উল্লেখ আছে যে ৰাষ্ট্ৰপতি ট্ৰাম্পে মহাকাশত ন মাহ ধৰি আৱদ্ধ হৈ থকা মহাকাশচাৰীসকলক উদ্ধাৰ কৰাৰ প্ৰতিশ্ৰুতি দিছিল। আজি তেওঁলোকে আমেৰিকাৰ উপসাগৰত সুৰক্ষিতভাৱে অৱতৰণ কৰিছে কেৱল মাথো ইলন মাস্ক, স্পেচএক্স আৰু নাছাৰ বাবে।