ইউএছটিএমৰ চাঞ্চেলৰ মহবুবুল হকক গ্ৰেপ্তাৰ

অসম আৰক্ষীয়ে শনিবাৰে পুৱা গুৱাহাটীৰ ঘোৰামাৰাস্থিত তেওঁৰ বাসগৃহৰ পৰা বিজ্ঞান আৰু প্ৰযুক্তি বিশ্ববিদ্যালয় মেঘালয়ৰ (ইউএছটিএম) উপাচাৰ্য মাহবুবুল হকক গ্ৰেপ্তাৰ কৰে।

বাতৰি অনুসৰি, তেওঁক পানবজাৰ আৰক্ষী আৰু অসম আৰক্ষীৰ বিশেষ টাস্ক ফ'ৰ্চ (এছটিএফ)ৰ সৈতে গঠিত আৰক্ষীৰ এটা দলে গ্ৰেপ্তাৰ কৰে।

           জানিব পৰা মতে ইউএছটিএমৰ স্বত্বাধিকাৰী গৰাকীৰ বিৰুদ্ধে শ্ৰীভূমিৰ কেন্দ্রীয় বিদ্যালয়ৰ চিবিএচচিৰ দ্বাদশ মানৰ পদার্থ বিজ্ঞান বিভাগৰ পৰীক্ষাত অৱতীৰ্ণ হোৱা ২১৪ গৰাকী পৰীক্ষাৰ্থীক সহায় কৰাৰ প্ৰলোভনেৰে মহবুবুল হকৰ প্ৰতিষ্ঠানে ধন লোৱাৰ অভিযোগ উদ্থাপিত হৈছিল ৷

আনহাতে পৰীক্ষা কেন্দ্ৰত কোনো সহায় নাপায় পৰীক্ষাৰ্থী সকলে এক উত্তপ্ত পৰিস্থিতিৰ সৃষ্টি কৰি মহবুবুল হকৰ প্ৰতিষ্ঠানৰ বিৰুদ্ধে সৰৱ হৈ পৰে ৷ তেওঁলোকৰ অভিযোগ অনুসৰি ধন লৈ তেওঁলোকক পৰীক্ষাত সহায় কৰাৰ প্ৰতিশ্ৰুতি দিছিল ৷ ইতিমধ্যে এই অভিযোগ সন্দৰ্ভত শ্ৰীভূমি থানাত দিয়া এজাহাৰৰ ভিত্তিত শনিবাৰে পুৱতি নিশা প্ৰায় ১ঃ৩০ মান বজাত শ্ৰীভূমি আৰক্ষীয়ে গুৱাহাটী আৰক্ষীৰ সহযোগত ঘোঁৰামাৰাৰ পৰা মহবুবুল হকক গ্ৰেপ্তাৰ কৰে ৷ আটকাধীন হকক প্ৰথমে পানবজাৰ থানালৈ নিয়া হয় আৰু তাৰপিছত শ্ৰীভূমিলৈ লৈ যোৱা যায় ৷