কংগ্ৰেছ সাংসদ ৰকিবুল হুছেইনক নগাঁৱত দুৰ্বৃত্তৰ আক্ৰমণ

বৃহস্পতিবাৰে কংগ্ৰেছ সাংসদ ৰকিবুল হুছেইনক ৰূপহীহাটৰ নতুন বজাৰত অৱস্থিত গুণাবাৰীত এখন দলীয় সভালৈ যাত্ৰা কৰি থকা অৱস্থাত মুখাপিন্ধা আক্ৰমণকাৰীৰ এটা দলে আক্ৰমণ কৰে। জানিব পৰা মতে আক্ৰমণকাৰীসকলে মুখমণ্ডল ক'লা কাপোৰেৰে ঢাকি ৰাখিছিল আৰু সাংসদজনক আক্ৰমণ কৰাৰ পূৰ্বে ক'লা পতাকা প্ৰদৰ্শন কৰিছিল। সাংসদগৰাকীৰ দেহৰক্ষীকো প্ৰহাৰ কৰিছিল দুৰ্বৃত্তৰ দলটোৱে। ক্ৰিকেট বেটেৰে ৰাজপথৰ মাজতে আক্ৰমণ কৰা হৈছিল ধুবুৰীৰ সাংসদ তথা চামগুৰিৰ প্ৰাক্তন বিধায়কগৰাকীক। সাংসদগৰাকীৰ লগত আছিল তেওঁৰ পুত্ৰ তানজিল হুছেইন আৰু পুত্ৰৰ উপৰিও সাংসদগৰাকীৰ লগত আছিল ৰূপহীহাটৰ কংগ্ৰেছী বিধায়ক নুৰুল হুদা।  তেওঁৰ সুৰক্ষাৰ বাবে নিৰাপত্তাৰক্ষীয়ে অৱশেষত সতৰ্কবাণী মূলক গুলী চালনা কৰিবলৈ বাধ্য হৈছিল ।

     অৱশ্যে বৰ্তমান সময়ত নিয়ন্ত্ৰণাধীন অৱস্থাত আছে পৰিস্থিতি। কিন্তু সমগ্ৰ ঘটনাটোক লৈ চাঞ্চল্যই বিৰাজ কৰিছে অঞ্চলটোত। সাংসদগৰাকীৰ ওপৰত হোৱা এই আক্ৰমণক তীব্ৰ গৰিহণা দিছে একাংশ স্থানীয় লোকে। সামাজিক মাধ্যমযোগে প্ৰতিক্ৰিয়া প্ৰকাশ কৰিছে বিভিন্নজনে।

        ইয়াৰ পূৰ্বেও উপ-নিৰ্বাচনৰ ভোটগ্ৰহণৰ দিনাও চামগুৰিত ৰকিবুল হুছেইনৰ কনভয়ত আক্ৰমণ কৰিছিল দুৰ্বৃত্তই আৰু তেওঁৰ বাসগৃহটো আক্ৰমণ সংঘটিত হৈছিল।