লেহেমীয়া অভাৰৰ বাবে ৰিয়ান পৰাগক ১২ লাখ টকাৰ জৰিমনা

ভাৰতীয় ক্ৰিকেট নিয়ন্ত্ৰণ ব'ৰ্ডে (বিচিচিআই) কালি গুৱাহাটীৰ বৰ্ষাপাৰাৰ এ চি এ ষ্টেডিয়ামত চেন্নাই চুপাৰ কিংছৰ বিৰুদ্ধে আই পি এল খেলৰ সময়ত লেহেম অভাৰ-ৰেট বজাই ৰখাৰ বাবে ৰাজস্থান ৰয়েলছৰ অন্তৱৰ্তীকালীন অধিনায়ক ৰিয়ান পৰাগৰ ওপৰত ১২ লাখ টকাৰ জৰিমনা আৰোপ কৰিছে।চেন্নাই ছুপাৰ কিংছৰ বিৰুদ্ধে ৰাজস্থান ৰয়েলছে ৬ ৰানত জয়লাভ কৰে। কিন্তু তাৰ পিছত অধিনায়ক ৰিয়ান পৰাগক জৰিমনা বিহা হৈছে।

আই পি এল ২০২৫ত শ্লো অভাৰ ৰেটৰ দোষী সাব্যস্ত হোৱা দ্বিতীয়জন অধিনায়ক ৰিয়ান পৰাগ।  ইয়াৰ পূৰ্বে মুম্বাই ইণ্ডিয়ানছৰ অধিনায়ক হাৰ্দিক পাণ্ডিয়াক ইয়াৰ বাবে জৰিমনা বিহা হৈছিল।

লেহেমীয়া অভাৰ ৰেটৰ লগত জড়িত ৰিয়ান পৰাগৰ এইটো প্ৰথম ভুল। যাৰ বাবে IPL কোড অৱ কনডাক্টৰ ধাৰা ২.২২ ৰ অধীনত ১২ লাখ টকাৰ জৰিমনা বিহা হৈছে। ৰিয়ানৰ শেহতীয়া খেলখনত অধিনায়কত্ব আৰু বেটিং দুয়োটাই ভাল আছিল। ধোনীৰ হৈ যিদৰে তেওঁ বলাৰ ৰাখি থৈছিল, সেই সিদ্ধান্তক বহুতে প্ৰশংসা কৰিছে। ৰিয়ান পৰাগে বেটিংৰ ক্ষত্ৰতো ভাল প্ৰদৰ্শন কৰিছিল। তেওঁ‌ ২৮ টা বলৰ বিপৰিতে ৩৭ ৰান সংগ্ৰহ কৰিছিল।